دعوة للمشاركة-جمعية بادر للمواطنة والتنمية العادلة عودة إلى الفرص

جمعية بادر للمواطنة والتنمية العادلة هي جمعية تونسية غير ربحية من اهم الحاجات اللي تخدم عليها هي تنمية قدرات الشباب بش يكون فاعل منتج وايجابي، وكيف ما نقولو اسمها على جسمها وتحب الشباب يبادر وينشط في المجتمع متاعو وعلى اذاكا خدمت برشا مشاريع عالتمكين الاقتصادي للشباب وعاونت عدد كبير منهم انهم يعملو خطواتهم الاولى باش يفهمو عالم الاقتصاد وخاصة الentreprenariat والstart ups وكيفاه يسلكو امورهم ويحلو البيبان الي تعاونهم يعملو المشاريع لرواحهم وللحوم متاعهم

في نفس الثنية هاذي جمعية بادر بدات مشروع جديد بالشراكة مع الوكالة الآمريكية للتنمية الدولية بعنوان Youth Economic Empowerment. المشروع هذا باش يكون في ولايات تونس الكبرى وبالتحديد في البلايص هاذم: 

• ولاية تونس: الكرم٫ الحرايرية٫ السيجومي
• ولاية بن عروس: فوشانة٫ المحمدية ، حمام الانف
• ولاية منوبة: دوار هيشر
• ولاية آريانة: حي التضامن

المشروع باش يوفر دورات تدريبية للشباب في برشا مجالات منها الذكاء الاصطناعي وصناعة المحتوى وفي نفس الوقت باش نخدمو انو نعرفو اي ادارة ولا شركة ولا جمعية الي تنجم تعاون الشباب  في الحوم هاذي باش يتعرف على الفرص الاقتصادية المتوفرت و يولي يعرف كيفاه يحل الثنايا في حومتو. في نفس الوقت مع بعضنا باش نخلقو حاضنات pépinières في كل بلاصة للشباب الي باش يشارك وين ينجم يتلم ويعملو قعدات وانشطة. بالطبيعة المشروع ماهوش كان حديث اكهو اما باش نوفرو تمويل لكل بلاصة باش يعملو مبادرة اقتصادية الي تعاونهم وتعاون حومهم. وفي الاخر الهدف انو الشباب يعدي المعرفة هاذي لولاد وبنات حومهم ومع بعضهم يخليو الحومة حية وديما تقدم.